مش عارفة أوصف إحساسي.. ياسمينا العبد توجه رسالة مؤثرة بعد انتهاء مسلسل ميدتيرم

وجهت الفنانة الشابة ياسمينا العبد، رسالة مؤثرة، بعد أيام من انتهاء حلقات مسلسل ميدتيرم، العمل الدرامي الذي أشعل مواقع التواصل الاجتماعي واستحوذ على اهتمام الجمهور والمشاهدين، وذلك بسبب قصته التي تناقش قضية هامة خاصة بالمراهقين وطلاب الجامعات، والمشاكل النفسية التي يتعرضون لها.

ياسمينا العبد توجه رسالة مؤثرة بعد انتهاء مسلسل ميدتيرم

وكتبت الفنانة الشابة ياسمينا العبد، منشورا توجه فيه رسالتها المؤثرة، وفقا لما رصده موقع تحيا مصر، وذلك عبر صفحتها الرسمية على موقع التواصل الاجتماعي إنستجرام، قالت فيه: أنا كنت متأخرة في البوست ده لأني حقيقي مش عارفة أعبّر عن مشاعري بعد نهاية المسلسل. مش عارفة أقول إيه ولا أشكركم إزاي. المسلسل ده أقرب حاجة عملتها لقلبي.

وتابعت: أنا بجد مش قادرة أوصف التعب والمجهود اللي اتبذل من أكبر شخص لأصغر شخص، اللي ورا الكاميرا قبل اللي قدام الكاميرا بس الحقيقة إن كل شخص اشتغل في المشروع ده كان جزء أساسي من نجاحه. وإحنا بنقرأ وبنحضّر عمرنا ما كنا نتخيل إننا نوصل للتوب 1 على شاهد وWatch It، ولا إننا نوصل لمليار مشاهدة. يعني إيه الرقم ده أصلًا.

ياسيمنا العبد: كنت خايفة.. ومكنتش عارفة اني قد التحدي ولا لا

وأضافت ياسمينا العبد : كنت خايفة جدًا وأنا بشتغل على المشروع ده لأني ما كنتش عارفة هل هكون قد التحدي ولا لأ. لولا الأستاذة مريم الباجوري، واحدة من أهم المخرجين دلوقتي، ما كانش هيبقى فيه مسلسل أصلاً… بشكرك على ثقتك فيّ وثقتك في الشباب، وبنشكرك على العظمة اللي أنت فيها. أنا فخورة إني كنت جزء من أول عمل درامي ليكي. بحبك جدًا جدًا جدًا.

كل النجوم اللي كان ليا الشرف إني أشتغل معاهم، شكرًا على شغلكم اللي فوق العظمة. إنتوا كسّرتوا الدنيا، عمري ما اشتغلت مع ناس مليانة بالشغف بالشكل ده و الكيميا اللي كانت بينا كانت توفيق كبير من ربنا… انتم عيلة حقيقية بجد. بشكر المتحدة على الفرصة دي وعلى ثقتهم فيّ. شكرًا للأستاذ أحمد فايق، عبد الله غلوش، وأحمد شفيق على الدعم.

ياسمينا العبد: بشكر وزارة التعليم العالي وشكرا للجمهور على حبه الكبير

 واستكملت: ويارب اللي جاي يبقى أكبر وأحلى كمان، بشكر وزارة التعليم العالي على الدعم والتركيز العظيم، شكرًا إنكم مؤمنين بطاقة الشباب وبمشاكلنا، بشكر الأستاذ محمد صادق وورشة براح على الورق اللي شفنا نفسنا فيه، وأهم شكر في الدنيا كلها.

شكرًا ليكم إنتم على كمية الحب اللي أنا لحد النهارده مش قادرة أستوعبها. اندمجتوا في القصة بشكل عمري ما شوفته في حياتي، وتقريبًا عمري ما هشوفه. المشروع ده ليكم. صوتكم مسموع وتحدياتكم متقدّرة. اللي بيطلع من القلب بيروح للقلب.