شهدت قرية كفر شبين التابعة لمركز شبين القناطر بمحافظة القليوبية واقعة مقتل السائق حامد أحمد زايد، بعدما تلقى طعنة نافذة أثناء محاولة فض مشاجرة بين أقاربه وأحد الأشخاص.
مقتل سائق على يد لص بالقليوبية
وروت زوجة المجني عليه تفاصيل ما حدث، قائلة: في اليوم اللي حصلت فيه الواقعة كان جوزي بيتفرج على فرح من فوق السطح، وهو نازل شاف أولاد عمه بيجروا، فاتصل بابن عمه اللي قال له إنهم مسكوا حرامي.
وأضافت زوجة الضحية، قائلة: نزل يشوف إيه اللي بيحصل، ولقى ولاد عمه ماسكين الولد ومرضوش يبلغوا لما لقوه من البلد.. وكانوا بيحاولوا يعملوا جلسة عرفية بدل ما يسلموه للشرطة… واتصلوا على أهله ووقتها جه أخو الولد ومعاه شباب، وقعد يشتم ويزعق، فجوزي قال له خد أخوك وامشي واعتذر للناس.. لكن الولد اعتدى عليه وضربه في وجهه، وبعدها فتح مطواة وغزه في بطنه.
وتابعت الزوجة: نقلوا زوجي لمستشفى الجامعة ببنها، وقالوا الطعنة قطعت الأمعاء والشريان، وعملوا له عملية، لكنه قعد 8 أيام يعاني من الألم قبل ما يتوفى.. وعرفنا بعد كدا إن المتهيمن حرروا محضر بادعاءات كاذبة شد زوجي علشان ينفدوا من جريمتهم.
وأوضحت: ولاد عم زوجي قالوا لي ما تقلقيش، وإنهم هيشهدوا بالحقيقة ويفرغوا الكاميرات، لكن محدش عمل حاجة.. وجوزي اتوفى وماحدش وقف يشهد معاه.. ودلوقتي أنا أرملة ومعايا طفلين، وجوزي كان العائل الوحيد لينا.
واختتمت حديثها مطالبة بالعدالة: أنا عايزة القصاص العادل، وحق جوزي اللي مات ظلم.. وهو كان راجل مسالم معروف في البلد كلها إنه مالوش في المشاكل، ومالوش ذنب إنه يتقتل بالطريقة دي. أنا وضعي إيه بعد ما اترملت وأولاده اتيتموا.
