أثارت واقعة إنقاذ شاب يبلغ من العمر 21 عاما سيدة مسنة من الموت المحقق بعد اندلاع حريق في مبنى سكني بمنطقة فيصل، تعاطفا كبيرا على مواقع التواصل الاجتماعي، حيث خاطر بحياته وتعرض لإصابات خطيرة وحروق من الدرجة الثالثة خلال محاولته إنقاذها.
وقال شقيق الشاب عبد الله السيد: الحريق كان بعدنا بعمارتين، وأخويا صحي من النوم وجري لما سمع صريخ سيدة مسنة مكانش معاها حد، لقى باب العمارة مقفول طلع من على واجهة العمارة دورين علشان ينقذ السيدة.
وأضاف: أخويا شالها على كتفه، واتكهرب بسبب الماس الكهربائي، ومكانش عارف ينزل من العمارة بسبب الضلمة والدخان وكان هيتخنق.
وواصل: الناس كانت بتتفرج في الشارع وأخويا ضحى بحياته علشان ينقذ المسنة، وكل اللي كانوا في العمارة ماتوا لكن ربنا سترها عليه لحد ما الإسعاف جت خدته وأنقذوه.
واستكمل شقيق الشاب عبد الله: أخويا في المستشفى وحالته الصحية متدهورة وعنده حروق في جسمه من الدرجة الثالثة، ومفيش فيه حتة سليمة.. أنا بناشد المسؤولين يعالجوا أخويا، ويلاقي الدعم الكافي.
